【转5000字评测】OPPO PM-2分享報告
聲明:
首先多謝76以及OPPO代理BO Acoustic聲耀全音舉行呢個借機試聽活動,好幸運地可以參力到真係開心。遁例地先聲明呢個活動最終有一名試用家可以免費得到OPPO PM-2耳機一對,而其餘參賽者亦可以以優惠價購入一對OPPO PM-2耳機。但我對其他試用者以及自己既操守以及信用都非常有信心,希望呢個活動既分享文以及報告大家都聽得開心,睇得開心。
前言:重新出發之大耳機
以往係76我都算係活躍一分子,可惜近大半年忙都不可開交,無法子再好似以及咁積極分享。但係最近終於安頓落黎,而且亦好好配置好家用組合既前端部分,開始留意大耳機。或者76既朋友都有留意過,我對大耳機並未十分了解。一般聽大耳機我有兩點不甚欣賞:(1) 聲壓動態既取捨以及(2)配戴感。一般黎講,我聽音樂聽得比較細聲,導至聲壓以及動態要二選其一,用大耳機聽歌實在唔算好過癮;而且我頸部亦唔算非常壯健,好容易戴大耳機戴得唔舒服。不過舊旗艦大耳機AKG K702/beyerdynamic DT880/Sennheiser HD600三對都玩左一段時間,發現其實我對大耳機既不滿都未必係死症,所以決定重新出發,好好玩玩大耳機先。76呢個借耳機試用活動適得其時,實在令我相當開心。
OPPOPM-2磁振平膜耳機
我對於平板耳機既印象就係「唔少師兄都覺得同動圈唔同,部分師兄更認為平版耳機更好聽」以及「斷頸咁重」兩點。悉幸OPPO PM-2係新一代重量大幅減輕既平膜耳機,以及相比其他廠家既平膜耳機多上其他技術,引用官網所寫,PM-2同PM-1一樣用上突破性既螺旋增壓磁振平膜技術,相當有吸引力。
大耳機先決條件
正如我所言,對於大耳機我並未算係非常有好感。係聽音樂既時侯,音質當然重要,但我對於配戴感既要求並不亞於對音質既要求。歸納過往既經驗,就我個人既情況得出幾點:(1) 重量、(2)出線口、(3)夾力以及(4)形狀呢四點都相當重要。
就例子而言,AKG K702雖然輕,但單邊出線加上形狀較大,卸力方面未算掌控得宜,即使已經拉鬆左個耳機減輕夾頭問題,我仍然戴得未算好舒服;Sennheiser HD600中規中矩;反而令我感到驚訝既係beyerdynamic T1,我對T1既配戴無大問題,長時間聽亦無唔舒服既情況出現。睇怕耳機方面既人體工學實在非常唔簡單。
OPPO PM-2係呢方面做得非常唔錯。耳機墊軟塾,加上外型設計以及雙出線口令到PM-2重量分佈平衡,係配戴感上做得相當唔錯。聽PM-2既時侯我對於聲壓以及動態兩點亦無需要特別做取捨。以往我用大耳機正正因為配戴問題好少能夠一次過聽晒我最鐘意既一首交響樂,係Sergiu Celibidache於1994年指揮Munich Philharmonic Orchestra既Bruckner Symphony No. 9。但用住PM-2聽呢首超過100分鐘既大型交響樂並無問題,聽得相當開心。
配戴感過關實在非常難得,亦因為咁樣先能夠令我好好了解一下OPPO PM-2音質上既表現。
聽感分享
今日五月我係慕尼黑試過OPPOPM-1/HA-1西裝,感覺正面,但由於時間以及被下一位試聽用家既存在感震懾左,無法子好好認真了解下。就咁睇網上流通既資訊,PM-2係PM-1既精簡版;但與其靠模糊既印象講分別,今次我只係傾向將PM-2當係一對獨立既耳機,好好欣賞以及分享下感受。
前端配置
解碼:ViolectricV800/Questyle Q192
耳擴:ViolectricV200/Questyle Q192
USB線:Furutech GT2
RCA線:Furutech Alpha Line-1
電源線:FurutechG-320AG-18
我只係初初認真地接觸家用既耳機系統,用既有Violectric V200耳擴以及V800解碼或者係QuestyleAudio Q192電流放大耳擴。而作為初學者我決定先採取一個品牌走天下既玩法,RCA/電源線以及USB線都用上Furutech原廠線。
我主要用既配置係Violectric。Violectric呢個配置用上Furutech線之後聲音具能量感以及張力,凝聚力強,但分析力、立體感稍稍欠佳, 難以講係相當中正完整既聲音,不過無論推入耳式耳塞以至係大耳機,呢個組合都有一定既掌控力。而Questyle 自身音染特色較強,樂感良好,驅動低阻耳機或者入耳式耳塞表現都唔錯。
ViolectricV200/V800與OPPO PM-2:風度君子
OPPO PM-2呢對耳機比我既第一印象係聲音具約束力但收放有度。PM-2無大上大落既收放自如,我認為佢係收放得黎比較克制,收放得黎相當有風度。整體風格相當工整,但係呢種相當有理性既聲音之下有包含著熱情,恰妥適當既起伏,淳實而輕帶溫潤既聲音能夠牽動情感,但唔會主導左音樂本身,呢點實著有趣,亦同我聽過既耳機有分別。
我主力用過既耳機有一個問題,就係聽耐左會分開聲音以及音樂為兩個獨立元素。比如Sennheiser HD600,樂感動人,非常引人入勝,聲音密度高同時有活力加上本身相當唔錯既空氣感,聽落相當好聽;但聽耐左就開始會期待樂章大動態來臨既一刻,忘記左樂曲起伏鋪排。當然亦同聽歌當時心理或有關係,但聲音與音樂分立呢點,係我認為即使去卻左當時狀態等問題之後,仍然存在既一個問題。呢個亦係我而家手上無大耳機既最主要原因。
OPPO PM-2聲音克制有禮,無將感情淋漓盡致傾倒出黎,亦無侵略性攻擊性主導性。或者用個例子黎分享呢點會容易少少。
近來有隻CD我覺得幾有意思,係由Sony出品,Rudolf Buchbinder, Nikolaus Harnoncourt:Concentus Musicus Wien於2012年演奏既Mozart: Piano Concertos Nos. 23 & 25。基本上呢個算係一個historically informed performance,用上forte piano以及period instruments,同一般主流現代既古典演奏既pitch相當唔同。雖然我有接觸HIP,但實質能夠聽到現場既次數一隻手掌數得晒,未定好好下判語;不過我傾向認為Buchbinder/Harnoncourt/CMW今次既演奏,樂團座位放置因稍為放得較疏開未算得宜,呢個錄音並唔算好好聽。種種因素令我覺得呢隻CD存於有趣既範疇,但如終聽落生硬唔自然,聲音鬆散,但同時又會時不時有一簇簇打埋黎既樂器聲,簡單黎講呢隻CD實在唔會係我非常常聽既Mozart Piano Concertcos Nos. 23/25版本。
係Violectric既配置驅動下,用OPPO PM-2聽呢隻CD,感覺又稍有不同。PM-2呢個克制有禮既風格, 非常輕微地軟化左少許個種生硬既感覺;又或者可以講成係PM-2無強調高低兩端既聲音,聽落舒服唔少。亦非常有趣地,咁樣聽住歌我並唔聯想或者留意到PM-2係音場、空間感、結像、大動態等等技術層面既表現。但因為呢個係活動,所以亦有需要好好挑挑呢幾個元素好好了解一下。
但即使好好留意,感覺上亦係差唔多,而且聽聽下又會變返繼續聽歌既一個狀態。當然,並唔係話PM-2無音場無空間感無動態無結像無硬質素。我傾向認為PM-2聲音克制雅逸,不著痕跡,同其他高階耳機著眼點不同。我認為PM-2無強調到某何特定表現,唔會強行投射一個可視化既大音場或者可視化既音場廳,亦唔會加大偏差營造非常分明既立體層次以及分離度等等方面既素質;同時間我亦唔會覺得PM-2係以上方面做得不足或者有缺陷。正如我上面提及到,聽住PM-2我真係唔會留意到器材元素。簡單黎講,我覺得PM-2雖有硬質素,但無強調出黎;一時三刻不覺驚艷,但會係一對戴左就唔會想除既耳機。
所以,非常簡單一個小結就係,PM-2係一個風度翩翩既君子,克制有禮;唔強出頭既風格有種慢性既討喜感。我亦非常慶幸可以借返屋企試聽,否則我對PM-2既評價應該會較為保守。呢點亦唔難理解,就好似PM-2定位非旗艦一樣:一般情況下一個CEO要有領導才能要閃閃亮亮吸引目光,風茫會蓋過其他較為低調既實幹派中堅分子。PM-2相當踏實既走向,工整淳實,閑然雅逸,要花時間先會令人著迷。但PM-2著實係一對久聽不累既高階耳機。
QuestyleQ192與OPPO PM-2:電流放大與平膜耳機既化學作用
係我主力使用Violectric既配置之下PM-2表現相當唔錯,本身亦打算就此打住,但係由於心癮起,以及報名時講過會用個電流放大耳擴試試推磁振平膜耳機,所以最後都係乖乖拎左部Questyle Q192出黎夾夾。Q192之前同甜鬆潤師兄發過文,指出過呢部機雖然有意思但亦有缺點。近來用黎推過下低阻便攜耳機例如beyerdynamic T51P或者係ATH ESW11LTD等都還可以但質素以及聽感都未算係令我可以心滿意足既程度。理論上電流放大式耳擴同磁振平膜耳機係夾,但老老實實講本身期望唔算特大。
不過還好有試。
Q192驅動之下,質素雖然的確不及Violectric套裝,而且定位比較近身,令PM-2君子既形象大幅削去,但整體聲音更為活潑生色,高頻明亮飄揚,低頻下潛較為粗糙但富於樂感,同Questyle本身染色有相當關係。聽住Hyperion出品,Stephen Hough, Lawrence Foster: City ofBirmingham Symphony Orchestra表演既Mendelssohn Piano Concerto No. 1,比用Violectric驅動既時侯塗上一層奶油味,稍稍去卻冷靜但對於呢首樂曲既歡愉氣派表達掌控更佳,聽得非常過癮。
我對於鋼琴聲認識會稍稍較其他樂器或者人聲等元素為深。我認為用耳機聽鋼琴聲有幾個取捨,結像度、琴腔既木聲以、鋼琴鍵聲以及琴聲自有既波音以及弧度往往好難完全平衡。Q192下既OPPO PM-2在於鋼琴鍵聲以及琴聲自有既波音以及弧度做得非常優秀,呢點我覺得同本身PM-2個種輕自克制、唔會令泛音泛濫既表達手法有關係。
比較難表達既係,好難講得出令我覺得Q192推PM-2令我感覺正面既原因。雖然我對於電子工程認知相當少,但我傾向歸因於電流放大同平膜耳機既化學作用。好一段時間前寫過分享文討論Ocharaku Flat4-KURO耳機,以及AHA-120唔同電流輸出既分別。Q192驅動PM-2既感覺恰如滿足到較食電流既耳機一樣,分別非常微妙。要講係聲音豐盈飽滿並唔恰當,要講係聲音靈動帶神亦唔合適。但係Q192驅動既PM-2聲音質感同Violectric驅動下既PM-2有分別,前者驅動下既PM-2比後者「更為多更為密」,但呢種「更為多更為密」同又iPod直推轉用Lehmann Black Cube Linear推Sennheiser HD600個種「更為多更為密」既改變。
總體黎講Violectric驅動下既聲音耐聽非常,克制而有風度既形象令我相當心怡同時亦慢慢形成左我對PM-2既既成形象;而Questyle驅動下既PM-2活力大增,質素稍稍妥協亦相對無咁耐聽。Q192驅動之下生色不少既PM-2仍然唔係大起大落淋漓盡致型既奔放耳機但引人入勝程度大增。
形象化黎講,Violectric同PM-2出黎既感覺類似英式老指揮,而Questyle同PM-2出黎既感覺似係新派年輕指揮咁樣(其實我覺得Q192+PM-2個印象幾似Ainars Rubikis呢位指揮,佢曾經到過香港表演:http://www.hkphil.org/eng/concer ...rtdetail.jsp?id=239)。後者雖然無咁克制亦無閑然而又去卻左紳士風度,但猶有一兩分雅逸,加添幾分動人既風采,雖非耐聽之選,但令我耳目一新。
簡而言之,兩個組合出既聲音風格小留大變,基本上我無法好好下一個結語。而OPPO PM-2反映前端能力不錯但未至於挑食,敏感程度並不對秤。用上質素較弱既時侯,PM-2未至於會難聽;用上較高級別既前端,PM-2則會有明顯進步。或者因為咁樣,所以PM-2令唔少其他試用家都覺得佢相當好推。
未能總結既耳機
其實咁樣睇呢個分享,亦睇得清楚我未能好確切講得出到底PM-2係一對如何既耳機;唔同既耳擴推動之下,PM-2既表現分別唔細。我覺得不足為奇:睇返活動招募既連結,引用五位有相當經驗玩家既時侯,都睇見有唔同既評語。用PM-2聽大場面抑或小編制我都覺得相當唔錯,未有特別偏好。 如果容我有保留地做個小小而又簡單既總評,PM-2本質具備一種克制有禮既風格,有著淳實而輕帶溫潤音色, 聲音具约束力但亦唔算令風格調向變得沉實嚴肅;即使唔同前端下有一定程度上既差別,但呢個似乎會係PM-2本質性既特色。
有始有終,試玩活動報告必需做好。正如上文所言,我對於家用系統認識唔深,未必能夠好確切地認識到呢對耳機。但對於PM-2而言,我覺得有意思值得再提幾個元素會係:
(1) 耳擴對PM-2於風格以及音色上既影響比質素上既影響大
(2) PM-2配戴感良好
(3) 我現有既耳擴以及解碼未必會係PM-2既最佳搭檔
(4) 磁振平膜耳機應該同電流放大耳擴真係有化學作用
(5) PM-2對於前端不對秤地敏感
感覺上以聲音而言,PM-2係一對走向比較低調既高階耳機。無非常得宜既前端配置或者要令師兄師姐們花上一定時間先感受到PM-2克制有禮既特色,而且要好好地完全發揮到PM-2相信都要花上些少精神同時間。當然我Violectric/Questyle既配置驅動PM-2效果亦唔錯,但我深信76既師兄師姐們係玩耳機呢門興趣入面比較多會係完美主義者。希望其他參加試玩以及其他有入手PM-2既師兄師姐們都分享一下搭配心得,交流交流。
後記與副部:便攜前端
另外拎左試用機時有一條3.5版既短耳機線;相當有趣。用上HiFiMAN HM-802加上推力較大既第三方製既三版分立耳放卡以及平衡卡驅動PM-2,有一定聲壓亦無特別唔好聽既聲音。但即使聽起上黎絕不失禮,我個人偏好都係用返大機搞呢對平膜耳機啦。
有趣既一點係,換上唔同耳放卡PM-2既聲音都有改變;用上三版分立卡時聲音剛聲強同亦解像度稍弱,但聲音密度相對較為豐盈;至於用上平衡卡聲音即時柔和唔少,整體音質有所提昇但聽落則會覺得有少少欠缺生命力。相信同我上文既結合部分一致。
呢個Post第一個回文會係更新部分,包含一部分我未能好肯定既睇法以及心得,唔貼於正文方便師兄師姐們可以分開主體以及副文內容;但都希望大家有時間都會睇埋更新部分啦。
更新部分
其之一:相性較高既錄音類別
雖然PM-2對於唔同類型既錄音相容性相當高,但我傾向更為喜歡用PM-2聽Analogue既錄音。新既數碼錄音或者Hi Res檔雖然都好聽,但PM-2更能展示到Analogue錄音既韻味。
我本身對錄音要求唔算非常高,但對於有年期既錄音我則會更寬容。近來NHK Symphony Orchestra 85週年系列既唱片我相當喜歡,有唔少名家係60至70年代遊日表演時期既演奏。呢個系列唱片特色,從佢包裝已經可以睇出,就係有一種古色古香既風韻。我對黑膠認識相當淺,但我覺得呢個系列有些微既黑膠味。
用PM-2聽呢個系列,例如係Horst Stein指揮既Beethoven Symphony No. 6,或者係Khachaturian既Masquerade Suite,以及Emil Gilels彈奏、Wolfgang Sawallisch指揮既Beethoven Piano Concerto No.5都有種老舊風采。雖然整體聲音並唔高清,甚至稍為帶種暗啞既感覺,但其溫潤濃郁既特色帶有一種具年華既生命力。PM-2暫時會係我多時間玩既大耳機入面最能表達出呢個生命力既耳機。
第三張唱片因為無法Resize至同以上兩張一樣,只好唔貼圖出黎了。
其之二:高階定位及與OPPO PM-1比較
呢個部分只作為補充而非於正文係因為主要內容都係根據唔同時期既記憶以及印象,並未能好似正文一樣一邊聽一邊打,所以我認為分開黎分享會比較恰當。
前文亦講過PM-2係一對高階耳機。當然呢個涉及其定價較高,潛意識會標左PM-2係一對高檔次既產品,但即使放開呢個Stereotype,PM-2質素上亦屬高水準之作。
我係香港亦試過一次OPPOPM-1,用上HiFiMANHM-901插底座出BursonConductor試聽。印象係PM-1能一瞬間出到深遂震撼既低頻,亮麗深刻,過癮非常,有旗艦作品既霸氣。PM-2則係克制有禮,有約束力,傳遞出不多不少既素質與分量既同時有種高度既控制力。由於試機時間短以及前端差別太大既關係,我唔夠能好講得出整體上PM-1與PM-2水準既分別,期待有機會好好再了解一下。
其之三:前端影響以及後續期望
係一次機會下,我深明前端對於耳機表現影響之大。於香港某店我試過一對beyerdynamic T1,我非常喜歡。前端應該係用上Linnenberg CDP,CD用上八爪魚防震器,有一個大型電源處理器,解碼及耳放用上Violectric V800/V200,耳機用上T1。呢個前端下既T1有強動態以及超強微動態,係我聽過風格最強但質素亦係最高既T1。個個時侯心諗,明明都係T1,點解分別可以咁大架呢? 個分別達至蛻變既水平,令我印象深刻。由個個時侯開始,我覺得雖然要將耳機實力大約展示出黎其非太難;但要完全解放耳機既實力並非單係用上好解碼耳擴加上好線材就可以。
我認為OPPO PM-2亦有機會可以大蛻變。我認識既PM-2同T1共通點都係對前端不對秤地敏感,前端弱都唔會令呢兩對耳機變得好難聽,但前端好的話對耳機表現加乘好大。我認為我現時既家用既系統雖然將PM-2既高水準展現到出黎,但未能將PM-2深層既能力完全解放。我傾向認為用上較高階既電流放大耳擴會係其中一個可取既方案,也許Bakoon Japan新型號既HPA將會係一個好選擇。
我最期待能夠解放到PM-2對於微動態以及聲音細緻度呢兩分面既潛力。我自己既家用系統之下,PM-2係呢兩方面表現雖然唔錯,但未亦至於相當強。雖然無理論根據,但直覺加上Violectric/Questyle驅動之下既表現分野令我認為PM-2係微動態以及聲音細緻度兩方面既造詣理應唔止呢個水平。到底玩盡左既PM-2會係點,真係令我相當期待。
文章来源:http://www.post76.com/x2/forum.php?mod=viewthread&tid=202315
页:
[1]